Flåbygd: ætter og folkeliv

Fyreord

Denne boka byggjer i hovudsaka på eit arbeid som Olav Stranna gav ut i 1921: «Lunde Herad med Flaabygd. Gardesogur og Ættetavlur» Som ein ser, blir det svært ofte vist til denne boka av Stranna, som enno er å få kjøpt i Lunde Sogelag.

Boka «Flåbygd. Ætter og folkeliv», greier ut om i alt 35 ætter. Om nokon skulle sakna visse ætter, finn eg det rett å opplyse at alle er spurde om å vera med.

Nokre av dei 35 ættene er «nye» ætter, men dei fleste har opphavet sitt i dei ættene Stranna har greidd ut om.

Oppsettinga av ættene har Stranna gjort etter eit system som er svært oversiktleg og lett å finna fram i. Diverre krev dette systemet så stor plass at eg har funne det rådlaust å nytta det her.

Eg vonar det skal gå greitt å finna fram også i det systemet eg har bruka. Alle har nok så mykje kjennskap til ætta si at dei lett vil finna fram når ein legg merke til «opninga» av kvar slekt, og dei romertala og bokstavane som er nytta der.

Eg vil, som Stranna gjer det, seia at eg har streva for at alt i boka skulle bli korrekt men at det av vanvare kan vera gjort mistak. Liksom Stranna vil eg be om orsaking for dette.

Så sender eg ein takk til alle dei som har hjelpt meg med å skaffa til veges opplysningar om dei einskilde ættene.

Så vidt eg ser, finst det «flåbygdingar» i kvar einaste bygd og by i Telemark og elles ut over heile Noregs land, ja i andre land også for den del.

Eg vil vone at rett mange av desse kan finna noko i denne boka som vil vera dei til glede og som vil vera med å styrkja bandet mellom dei og fedrejorda.

Flåbygd i februar 1978
Gunnar Opheim